أوّل شي نحنا بنقول عن حالنا حريّة تعبير و عبّر براحتك و مشان الله قول اللي في قلبك .... المشكلة إنّه ، وجدنا أنفسنا أحياناً بنلعب دور الرّقيب الذي نكره ، وأحياناً بنشطب تعليقات أو بنشفّرها.

عشان هيك و باختصار رح ننشر آداب التعليق بالنسبة إلنا أو بالأرجح الأسباب التي تؤدي إلى عدم نشر أي تعليق من جمهورنا العزيز اللي فعليّاً بنشتغل عشان نسمع تعليقاته (عنجد):

١- شخصنة الأمور: أي إنّك تدق في الشخص اللي بيحكي و مش بالموضوع اللي بيحكي فيه.
أكبر مثال على ذلك ما حدث مع السيّدة كارول كابلانيان من حملة لا شرف في الجريمة التي تحدّثت عن إعادة تعريف مفهوم الشرف و الكل دق فيها إنّه ليش أرمنيّة بتحكي بموضوع أردني!!!! و كأنّه كونها أردنيّة و مولودة في الأردن و عايشة فيها و كونها تقوم برسالة الدكتوراة في موضوع تحليل السياسات الاجتماعيّة حول موضوع جرائم الشرف لا يكفي! و ما أكثر الأمثلة ...

٢- المسبّات و التطعيمات و ما إلى ذلك

 ٣- التعليقات العنصريّة اللي بتيجي بأي حدا سواء أردني أو مصري أو صومالي

 
٤- أشياء بتخوّف يعني مثل التهجّم على شخصيّات عامّة و غيرها من الخطوط الحمراء إحم... و هاي بنخاف ننشرها عشان القوانين التي تحكم حريّة التعبير في الصحافة - واللي والله العليم تشمل التعليقات- مش واضحة بالنسبة لنا دائماً

 
بعدين في التعليقات الزنخة اللي بننشرها على كل حال و ها هي مرتّبة من الأقل زناخة إلى الأكثر زناخة:

١-  تعليقات ياي واو : كتيير حلو عرمرم

٢- التعليقات العربيزي: و هنا نعذر من لا يملك كي بورد عربي بس بتتعب عيوننا و نحنا بنقرأ التعليقات إتس ريلي ريلي باينفول فور ذي آيز 

٣- التعليقات إن إنجلش: يعني اللي بتكون مكتوبة بالإنجليزي ( دخلك الإنجليز بيحكوا مع بعض بالعربي؟)

٤- تعليقات الرّقابة المدنيّة : كما سمّاها بذكاء واحد من الجمهور: بمعنى مطالبة عرمرم بإزالة فيديوهات وإلّا عذاب القبر و تحت التراب و أفلام رعب

٥- تعليقات الحق مش عليهم : الحق على الموقع اللي ينشر هيك أفكار ، دخلك دخيلك الموقع مش مسؤول عن كل كلمة بتنحكى و أكيد إحنا مضطريّن لنشر أشياء مش على مزاجنا عشان هيك بننشر التعليقات الزّنخة بأنواعها
 

٦-  تعليق يعني هدول بدهم يحرّروا القدس: و هذا رد عليهم من الصديق عبد على موضوع رقص شوارع:  
"
04/22/2010 - 02:57
ABED
بدي ارد على الي حكى بدو يحررو الاقصى . يا خال ما لقيت من 5 مليار في العالم كله الا هدول الشباب شو بدك فيهم بعدين يا اخوي شمر على ايدك وروح حررها انت .وبعدين انت قلت هيك عشانك مقهور منهم (الغيرة) يعني . وبعدين هاي ثقافة زي مقلك الشب في الفيديو. وبعدين متى اه متى بدنا نعرف نعلق بادب وبعقل ؟؟؟؟؟؟؟!!!!!!!

"

بلاش زيادة حكي عن الأدب ، و لكن ما هو العقل الذي ينوّه إليه السيّد عبد؟ العقل باعتقادنا هو عدم الخلط بالأمور و عدم تحميل الأشياء فوق طاقتها

بمعنى شو دخل تحرير الأقصى بالرّقص ؟ و كيف ممكن أن نحرّر القدس من خلال عدم الرّقص؟ و هل بإمكان مجتمع سريع في جلد الذات و غير قادر على تقبّل واقع متغيّر وبعيد كل البعد عن تاريخه الذهبي أن يحرّر القدس قبل أن يحرّر نفسه من نفسه؟   

نحو مجتمع خالي من التشفير و الأحاديّة و الإضطهاد ...

صديق(ت) كم 

عرمرم